E depois do Oleiro…

Pasou o Domingo Oleiro e xa nos imos achegando ao día grande da festa. O pasado día 15 eran as Pitas -un ano máis- as encargadas de baixar as olas até a praza. Medio cento de  olas que ían escachar despois de ser xogadas por todas as persoas que se achegaron a gozar dunha tarde agradábel, na que o xogo das olas, a música d’Os Cuchufellos e os primeiros disfraces anunciaron a entrada na semana do Entroido. O que xa se vai convertindo nun clásico é o lume e os chourizos da noite (sempre e cando haxa alguén que se lembre de traelos). Bon, e a música alta do Jose, e “o can”…

A Pita en manualidades

Por fin podemos facer o noso recortáble da máscara da Pita. Fíxose esperar, aínda que finalmente o resultado foi bon. Son en total 5 manualidades dirixidas a distintas idades: tres fichas para colorear, a parte dianteira dunha carauta (para colorear, recortar e montar) e outra un chisco máis complicada para crear unha carauta completa de cartolina.

As fichas están deseñadas por Ana I. López e xa puideron verse os resultados nalgúns centros de ensino e lúdicos da cidade.

Se pertencedes a algún centro de ensino, asociación, centro lúdico… e queredes conseguir estas fichas, só tedes que pedilas por correo-e ao seguinte enderezo: festa.da.pita@gmail.com

O programa segue

Alá foi a primeira xornada da festa, na que a fariña foi a protagonista e na que o Meco foi colocado nun lugar preferencial dentro da praza; Meco que por certo, aguantou ben o temporal de vento da pasada semana, a non ser polo “aparato de mexar” que asustado e sorprendido polas frías temperaturas e os fortes vendavais decidiu emigrar a outros paraxes máis tranquilos.

Así as cousas, pasado o primeiro domingo chega o noso Domingo Oleiro (este ano o día 15), onde o xogo das olas vai ter especial protagonismo. As Pitas serán as encargadas -como de costume- de levar as olas até a praza e a música nesta ocasión correrá por conta da Charanga Os Cuchufellos, de Manzaneda.

Xa nos pasados días foron decoradas e pintadas as olas que van escachar ao longo da xornada, aínda que nesta ocasión notouse unha merma na afluencia nomeadamente das/os máis pequenas/os para tan artística labor.

Chega unha nova edición da Festa da Pita

Arrinca unha nova edición da Festa da Pita, e faino chea de cor, como no cartaz que fixo para esta edición ROBER (Roberto V. Araújo).  A festa dará comezo o vindeiro domingo 8 de febreiro e extenderase até o martes 24.

A cinta deste ano será violeta por ter sido o 2008 o ano contra da violencia de xénero, adicación esta que non foi suficiente para frear as -alomenos- 70 vítimas mortais da violencia machista. Tamén neste ano veu ao mundo unha nova persoa de interese para a nosa festa. Trátase de Xavier, fillo de 2 máscaras e por quen a cinta deste ano levará un “X“, na honra do noso novo e querido amigo.