Así foi o Día grande

E rematou unha nova edición da Festa da Pita. E van 13. Mesmo sentimos algo de vértixe ao pensar na primeira ou nas primeiras edicións, no ano 1999 e nas numerosas anécdotas, traballos, loitas, noites no local social, conversas cos veciños e coas veciñas que participaran no entroido (daquela Carnaval) de mediados do século pasado…

O caso é que o Martes de Entroido do 2011 chegou traendo a primavera por adiantado. A xornada comezaba pola mañá con un percorrido polo barrio de Pitas e músicos anunciando a chegada do día grande. Ás 13 h. tivo lugar, un ano máis,  a Voda da Pita, coa participación de veciñas e veciños, á que seguiu o convite habitual, onde as distintas familias e grupos asistentes compartillaron un momento gastronómico e festivo.

Xa de tarde, houbo espazo para os disfrazes e o baile, até a despedida do Entroido coa queima do Meco, que tivo lugar nesta ocasión xa ben entrada a noite.

Achegamos a continuación algunhas fotos da xornada

Seguir lendo

Desfile do Entroido

Pasado domingo 6 tiña lugar o desfile do Entroido do concello de Ourense. Un ano máis -e xa van 10- as Pitas participaron na marcha, abrindo o desfile e fóra de concurso.

Aínda que o día estivo case de primavera, con sol e boas temperaturas, unha pequena treboada ameazou no comezo do desfile, que saía ás 6 da tarde do entorno da comisaría. Esta circunstancia, que facía bon o refrán de “se non chove o Domingo Corredoiro, chove o Domingo de Entroido” foi só unha anécdota temporal, que non interrumpiu a saída ás rúas de milleiros de ourensáns. Seguir lendo

Sábado de Entroido

Onte sábado tiña lugar a despedida da solteiría dos nosos noivos máis queridos. E houbo que ir de troula polo barrio para que reflexionaran e o pensaran ben antes de tan importante decisión. Tamén foron franqueadas as portas dalgunhas casas, atendendo á hospitalidade das poucas veciñas que non estaban durmidas e anunciándolles a voda que vai ter lugar o Martes de Entroido ás 13 h. na Praza d’As Eiroás.

A continuación algunhas fotos da noite… as que aínda se poden ver Seguir lendo

Pregón do Entroido

Pasado venres arrincaba “oficialmente” o Entroido na cidade de Ourense. E é que, aínda que nalgúns lugares xa levemos un par de semanas trouleando, os días grandes -do Entroido propiamente dito- comezan agora.

No pregón do Entroido participaron as Pitas, xunto aos outros entroidos da cidade (Seixalbo e A Ponte, ademáis do puramente urbán e dunha representación de Trives). Posteriormente, a carpa situada na Alameda estivo chea para celebrar a primeira cea do Entroido. Eis algunhas imaxes do día:

Seguir lendo

A tenda de Dona Gumersinda

Á tenda de Dona Gumersinda – Outlet xa comezaron a chegar os pedidos. Materiais variados sobre a Pita que, ademáis de apoiar a sufragar os custes de organización da festa, permítenlle ás/aos asistentes levar unha lembranza da nosa festa e da nosa personaxe máis querida.

A continuación amosamos algunhas das cousas que podedes atopar na nosa “tenda”:

Seguir lendo

Programa do Entroido en Ourense

Xa entramos na recta final do Entroido, e na nosa cidade -ademáis da Festa da Pita– tamén temos outros puntos de interese e outras actividades que se desenvolven dentro da festa. Aquí podedes consultar o programa do Entroido 2011 en Ourense.

Seguir lendo