Así foi o Domingo Oleiro

Xa ten chovido algo desde aquela primeira edición na que un pequeno grupo de veciñas e veciños do barrio, acompañados polos amigos da xa tristemente desaparecida Agrupación Folclórica Foula, xogaban até escachar as 6 olas de barro e algunha que outra cunca do mesmo material.
Onte, 18 anos despois daquel 7 de febreiro do 1999, eran 60 as olas chegadas do Alto do Couso que protagonizaron unha xornada soleada e moi agradábel na praza das Eiroás.

Acompañáronnos algúns mozos e mozas das novas Escolas amigas da Pita e a Charanga Os Chispas, que amenizou musicalmente a tarde. Gozamos pois dun bon ambiente, dun clima desenfadado e das primeiras mascaradas que se puideron ver polo barrio.

Este ano, as olas estaban decoradas por escolares do CEIP Manuel Luis Acuña e do CEIP O Couto, ademáis das nenas e dos nenos do barrio que se achegaron até a Casa veciñal na tarde do sábado.

Como de costume, foron as primeiras Pitas do ano as que trouxeron o carro das olas até a praza, ademáis de seren as encargadas de abrir o tradicional xogo das olas. E fixérono lucindo a fita deste 2017, a marrón, que lembra a importancia das migracións para a evolución humana e para o diálogo intercultural.

Velaquí algunhas imaxes do domingo:

 

Advertisements