Programa 2018

3,2,1… e 20. Vinte edicións da Festa da Pita son as que se levan celebrado no barrio ourensán das Eiroás. E aínda que as condicións nos últimos anos semella que empioran por momentos, debido nomeadamente aos atrancos da Administración, o noso barrio segue ocupando un espazo dentro do ciclo do Entroido. Vindeiro domingo arrinca, pois, esta vixésima edición, contando coas benzóns e as licencias oportunas das autoridades do barrio e sabendo que este ano o Meco repetirá asesores de imaxe da man da familia Perez-González. Pero iso será o domingo, pouco antes do xantar, cando deamos saída á celebración do Entroido en todo o término municipal do concello de Ourense. Para alén da participación no desfile da cidade ou das actividades programadas en diversos centros de ensino, o programa deste ano nas Eiroás segue a tónica das edicións anteriores, consistindo no seguinte:

Advertisements

Cartaz do 20º aniversario

Xa pasaron 15 anos desde que a imaxe da nosa festa é produto da creación dun artista ourensán, medrando a colección das visións gráficas coas que pintores, deseñadores, ilustradores… nos agasallan cada ano. Este 2018 é un ano especial, pois a Festa da Pita chega á súa 20º aniversario. Foi por isto que demos un pequeno salto, procurando -apartir da presente edición- a implicación de artistas do panorama galego. Así, contamos nesta edición coa colaboración de María Piensos, pintora pop e colorista coruñesa, especialista en Action-Painting e Performance con un amplo currículo e unha extensa obra, que nos achega unha particular visión de máscara.

Podedes ver aquí todos os carteis das edicións anteriores.
Moitas grazas, María, pola túa desinteresada colaboración.

A troba do bugallo

Hai 3 anos, a Voda da Pita fechaba con umha canción que aínda segue na memoria de moitas persoas que cantaron e bailaron aquel son tan pegadizo. Era o “Nabo, nabiza, grelo”, que neste 2017 forma parte do primeiro disco editado polos amigos da Troba do Bugallo. Coa súa colaboración, queremos compartir con vós este seu primeiro traballo discográfico. Só tedes que respostar a umha pregunta:

Como se chama a vaca que non quere ser Chenoa?