Martes de Entroido 2022

Desta vez a meteoroloxía soubo adaptarse ben á nosa festa para deixarnos celebrar a Voda da Pita, despois da ruada polo barrio con máscaras e músicos, xa tradicional no programa festivo das Eiroás, aínda que a cautela (e a experiencia) fixo que decidiramos previamente celebrar o acto por baixo da carpa, o que sempre dificulta un pouco o espazo escénico e máis o técnico.

En calquera caso, á 1 do mediodía un crego disfrazado por momentos de showman, oficiaba unha cerimonia prantexada como a Voda que ti queres (e ti, e ti…), ante unha praza ben chea de fregueses chegados de distintos puntos do país, entre os que se atopaban os nosos amigos do Andén Primeiro, unha familia de Ames que nos achegou o fabuloso traballo que desenvolveron xunto á escola de Barouta sobre a máscara da Pita ou mesmo o alcalde de Ourense e outras personalidades que non quixeron perderse a voda máis popular das Eiroás. Emulando ao famoso festival, o torreiro da festa converteuse nunha consulta sobre a idoneidade de ter ou non ter a voda. E tamén como nese famoso festival, a opinión maioritaria da veciñanza foi menosprezada por un xurado que interpretou ao seu xeito os resultados da votación e anulando a celebración da voda. Tiveron que chegar as nosas Tanxugueiras para lembrarnos que os noivos viñeron para casar e que a opinión do pobo non pode desprezarse. Así chegaron os noivos, axudados polo Tinder, a comprometerse na súa nova vida, non sen antes ver como eran expulsados polo crego, que quedaba só enriba do escenario reclamando a súa autoridade até decatarse que el só non era quen de facer nada e moito menos de oficiar a cerimonia. Tamén tivemos a visita (anos despois) da nosa Infanta Cristina, que aproveitaba a visita a Ourense acompañando á súa nai para dicirnos que agora si que se lembraba… e vaia se se lembraba! A mesma infanta librounos do xurado moi profesional e máis dun cuspeaceitunas que estaba buscando traballo, buscándolles un sitio no Consti ou na Audiencia, ou no piso do fiscal, que quedou libre. Para rematar, e como ven sendo habitual, o noso garda-civil tentou ponher orde pola brava na cinzarrada que reclamaba o pagamento da festa aos noivos e as Pitas irrumpiron na escena para conciliar o pasado e o presente na procura dun futuro común.

Xa de tarde, non fomos quen de sacar moito os fociños fóra da carpa até pouco antes da Queima do Meco, momento no que a choiva voltou a dar umha tregua para que puideramos despedir o Entroido das Eiroás como ben se merece ate o vindeiro 5 de febreiro de 2023.

Só queda dar as grazas. Grazas por estarmos outra vez na praza, podérmonos ver e mesmo abrazar. Grazas ao concello de Ourense por facilitar a celebración deste entroido de transición, grazas ao Centro Comercial Ponte Vella e a BeOne polo seu apoio nos patrocinios e grazas ás veciñas e aos veciños que fixeron posible a festa co seu apoio e a súa complicidade e grazas a todas as persoas que nos acompañastes, do barrio ou doutros lugares, facéndonos sentir a sorte que temos de contar con veciñas e veciños en tantos outros lugares do mapa.

Velaquí algunhas imaxes da xornada. E tamén aquí temos que agradecer á Raquel Carreira a cesión das imaxes da Voda.

Semana do Entroido

Na semana do Entroido, e antes de chegar o día grande, a Pita e a nosa festa tiveron presenza en distintos espazos. O primeiro, o escolar, coa visita da nosa máscara aos colexios de San Pío X e do Couto, á parte dos traballos realizados sobre a nosa máscara e a nosa festa por distintos centros do país. Tamén é de salientar o desfile escolar que tivo lugar na mañá do venres de Entroido pola cidade de Ourense, homenaxeando á nosa máscara e encabezado polo CEIP Virxe de Covadonga.
Tamén participamos en 2 desfiles na cidade de Ourense. O primeiro deles, na tarde-noite do venres, percorreu o espazo histórico da cidade xunto aos Entroidos de Seixalbo e A Ponte, amais dumha representación dos Galos da Mezquita, dos Felos de Esgos, os Follateiros de Lobios, os danzantes de Vilameá-Riocaldo e os folións de Buxán e de Carracedo da Serra.
E na tarde do domingo, encabezamos -un ano máis- o Desfile do Entroido de Ourense. Mágoa este ano que nos acompañara durante todo o percorrido unha persoa posta pola organización que non debía saber ben como ía isto do Entroido, permanecendo en todo momento a escasos 2 metros das primeiras Pitas, e mesmo interrumpindo as interaccións que ás veces se producían co público, o que dificultou en boa medida o noso desfile… Pero outro ano será mellor.

Velaquí algunhas imaxes dos distintos momentos.

Alá van as olas

Agora si que puideron voar as olas. 2 anos despois volta a normalidade á praza das Eiroás no seu Entroido. E faino con unha climatoloxía estupenda (talvez d emáis para estas datas) nunha tarde festiva e moi participativa, na que houbo espazo para as olas, os globos de auga e o baile coa Charanga Alambique.

Temos poucas fotos da xornada, polo que agradeceriamos que nos enviarades as que consideredes ou subades as fotos ás vosas redes sociais co cancelo #FestaDaPita2022.

Domingo Oleiro 2022

Mañá domingo 20 ás 5 da tarde (máis ou menos) chegarán á praza das Eiroás as olas que van protagonizar a xornada festiva da Festa da Pita. E farano, un ano máis, da man da Pita, que se deixará ver por vez primeira neste Entroido despois de 2 anos sen poder saír con normalidade.

As Pitas que saian maña levarán no broche a fita que vai representar ao presente ano, o 2022. Esta será de cor PRATEADA, atendendo á cor empregada internacionalmente para chamar a atención sobre a saúde mental. Despois de 2 anos de pandemia, víronse incrementadas as consultas médicas relacionadas coa saúde mental. Tamén se incrementou dun xeito máis que notable o índice de suicidios, perdendo a vida 307 persoas en Galicia e 3.671 no conxunto do Estado. Galicia ten umha taxa de suicidios de 13,11 por cada 100.000 habitantes, case o dobre da media estatal (7,79). Ademais este ano tamén foi testigo de como diversas celebridades, principalmente da cultura e do deporte sumáronse á visibilización deste problema oculto cara o que semella que non queremos mirar. E contodo, aínda non contamos con umha estratexia de prevención do suicidio. Esta é a reivindicación da Pita no ano 2022 e aquí podes lembrar a fita que representa cada ano na nosa máscara.

Veñen oliñas

Xa chega o último domingo antes do Entroido, que nas Eiroás chamamos Oleiro, e con el o xogo das olas e a primeira aparición da nosa máscada. Tamén ven sendo costume nos últimos anos, contar co apoio dunha escola da cidade, que nos axuda a decorar as olas que han escachar este día na praza.

Neste ano 2022, a nova escola amiga da Pita é a Escola Oficial de Idiomas de Ourense, que nos recibiu no seu centro para falarmos do Entroido e da nosa festa, amais de facer unhas olas chulísimas, que se unirán ás que decoren mañá as nenas e os nenos do barrio.

Moitas grazas á Escola Oficial de Idiomas, ao Equipo de Dinamización da Lingua Galega e ao alumnado desta escola.

Velaquí algunhas fotos que nos fixeron chegar do obradoiro e do acto de hoxe, no que recollimos as olas e nomeamos á nova escola amiga.

O Antonio busca noiva para a Voda

“Xa tenho o nerflix, agora só me falta ela” Con estas palabras, manifestábanos a fonda señardade coa que vive o seu día a día o Antonio Guimarey. Hai anos que perdeu á súa muller e agora anda na procura dunha pitiña para chocaren os ovos xuntos.

Vive momentos de tanta angustia, cabo do lume da lareira da súa casa nas Eiroás, que se animou a crear un perfil en Tinder, por ver se atopa a unha nova compañeira coa que compartir torradas e agarimos nas longas noites de inverno.

O farelo volve á praza

Onte domingo 13 deu comezo a 24ª edición da Festa da Pita, coa celebración do Domingo Fareleiro. O dia estivo ben pasado por auga e talvez foi a nosa falta de previsión a que impediu que tiveramos un bo número de filloas para todo o Entroido.
A fin de semana arrincaba o sábado co asesoramento de imaxe do sr. Meco, que durmía baixo cuberto pola noite antes de trepar con grácil axilidade á cima da farola no mediodía do día seguinte.
Xa de tarde, o farelo voltou á praza das Eiroás. Malia a climatoloxía non axudaba, aínda houbo algúns atrevidos e algunhas atrevidas que aproveitaron as escampadas para achegarse á praza.
A festa está en marcha, outra vez. Recuperamos o Entroido e recuperamos a normalidade… pouco a pouco.

Velaquí unhas poucas fotos da xornada:

Programa 2022

Tras case dous anos de espera, chega o Entroido a Ourense. Tiveron que pasar 719 días para que as rúas da nosa cidade voltaran acoller novamente a celebración da festa -probablemente- máis imbricada na nosa xenética cultural. Despois da experiencia do ano pasado, que nos obrigara a reinventarnos a través da rede, o barrio das Eiroás inaugura o Entroido e unha nova edición da Festa da Pita coa celebración do Domingo Fareleiro.

Así, o vindeiro domingo día 13 dará comezo comezo unha festa de transición, con algunhas limitacións con respecto ao que era habitual hai uns anos e voltará a selo apartir do ano que ven. A 24ª edición da Festa da Pita conta coas benzóns e as licencias oportunas das autoridades do barrio, que agardan pola chegada do Meco pouco antes do xantar do domingo, para dar saída á celebración do Entroido en todo o termo municipal. Alén da participación nos desfiles da cidade (o día 27) e do CEIP Virxe de Covadonga (o día 25) e doutras actividades promocionais e divulgativas, o programa deste ano nas Eiroás -que vai estar atento ao desenvolvemento da situación sanitaria e ás normativas emanadas das administracións correspondentes- é o seguinte:

Imaxe da Festa da Pita 2022

Xa temos cartel para a 24ª edición da Festa da Pita e chega asinado por un amigo da festa, que xa colaborara con nós no ano 2009. Trátase de Rober, que nos propón algo así como un cartaz disfrazado. Sobre unha base na que xoga con deformacións na procura de transmitir o efecto de movemento, emprega materiais que lembran a ese apartado gastronómico -tan presente no Entroido- que se disfrazan dumha persoa disfrazada, ou mellor dito, vestida, de Pita, que non deixa de ser o elemento que diferencia á nosa festa.
Moitas grazas, Rober, pola túa colaboración. Aquí ou aquí podedes ver os seus traballos.
Se queredes, podedes ver os carteis doutras edicións, mentres non subimos, na xornada de mañá xoves, o programa da festa deste ano, que dará comezo o vindeiro domingo, día 13.

Resultados da consulta sobre o xantar

Hoxe pechouse o enquérito que vos propuxemos para saber como iamos facer co xantar nesta edición especial da Voda que ti queres. Lembrar que a pregunta era: Quen prefires que pague o xantar da Voda da Pita? E estes foron os resultados:
Que paguen a Gumersinda e o Antonio 59,57 %
Preferides convidar vós a todas e todos as/os titiriteiras/os 4,26 %
Facede o que queirades, imos comer igual 36,17 %

E despois de seren analizados a fondo polos nosos expertos, réstanlle importancia ao 59 e ao 36 e chaman a nosa atención sobre o número 4, que en binario está representado por 100, e en demoscopia o 100 é popularmente coñecido como tododios, entendendo isto como un dato irrefutable para comprendermos a intención real do público, que non foi outra que a de escoller esta opción, aínda que lle dera mal ao botón, o sistema funcionara erróneamente ou umha gastroenterite calquera non lle permitira pensar mellor.

Seguimos, pois, avanzando cara a Voda que ti queres, máis participativa e interactiva que nunca. E que non falten uns rabiños de polbo, se acaso.