Fotos 2022

O 2022 foi o ano da volta á praza. Despois de termos que darlle aos miolos para non deixar de celebrar o Entroido desde a casa na edición anterior, voltamos ás rúas, con certas precaucións pero con gana de reencontrarnos e de vivir o Entroido en comunidade. Arrincabamos co Domingo Fareleiro un pouco pasado por auga

Antes do Domingo Oleiro, visitamos á escola amiga deste ano: a Escola Oficial de Idiomas de Ourense. Tamén houbo tempo para decorar as olas no barrio. As mesmas olas que as Pitas baixaban á praza das Eiroás para escachar no xogo protagonista desta xornada do Entroido

O Domingo de Entroido, un ano máis, as Pitas encabezaron o desfile da cidade de Ourense, despois de participar no pregón do Entroido o venres e despois dunha semana con diversas visitas escolares

E no día grande houbo voda. A Pita casou, máis unha vez. As veciñas e os veciños tiveron festa toda a xornada e o Meco despediu o Entroido até a seguinte edición, que será a número 25 na intra-Historia da Festa da Pita.

  • GRAZAS POR TODO

  • Pechamos unha nova edición da festa. Alá van 25 anos botando foguetes e tentando crear unha identidade cultural, festiva e lúdica para o barrio e o seu contorno. 25 anos que deron para moito, para momentos bos e para momentos aínda mellores, con algúns que outros atrancos aos que sempre se lles atopa solución.
    Só queda agradecer a colaboración daquelas persoas e entidades que fixeron posíbel os distintos momentos da festa. Grazas ao Cosme, por poñerlle imaxe á 25ª edición da festa. Grazas ao Concello de Ourense, pola súa colaboración para levar adiante este entroido de transición. Grazas tamén ao INORDE, que nos cedeu as vallas para tentar ordenar unha praza, que máis semella un parque temático de sinais de tráfico, especialmente transitada por vehículos de fóra do barrio. Grazas aos centros de ensino e a esas outras entidades que traballan tan ben o Entroido e a nosa festa no seu centro, especialmente á nosa escola amiga deste ano, o CEIP Mestre Vide. Grazas ao Centro Comercial Ponte Vella e a BeOne, que nestes tempos especialmente difíciles permitiron -un ano máis- que seguiramos abusando deles e facendo posíbel que o Entroido chegara ás Eiroás. E grazas, por enriba de todo, ás veciñas e aos veciños sen cuxa colaboración e participación non tería sentido que o Meco presidira a praza durante estes 16 días. Grazas, tamén, á Raquel, que un ano máis continuou agasallándonos coas súas rosquillas.
    Grazas, por último, a todas as persoas que vos achegastes até As Eiroás, agardando que gozarades da festa ou cando menos da nosa hospitalidade. Fixemos o que puidemos; se nalgo faltamos, outro ano sobraremos. Pola nosa parte, voltaremos colgar o Meco (ou Meca) o 28 de xaneiro de 2024 para celebrarmos unha nova edición da Festa da Pita. Vivide o Entroido, aló onde esteades!

  • VODA DA PITA 2018

  • VODA DA PITA 2017

  • VODA DA PITA 2016

  • VODA DA PITA 2015

  • VODA DA PITA 2014

A %d blogueros les gusta esto: