Martes de Entroido 2023

As ganas de Entroido e a boa metoroloxía presente en todos os días da festa, fixo que o Martes fora, máis unha vez, o día grande nas Eiroás, por máis que a choiva ameazara desde primeiras horas. Así, puidemos dar conta do programa sen grandes atrancos, máis que os propiciados polo redeseño da praza e das infraestruturas necesarias para o desenvolvemento da festa.
Comezaba a xornada coa xa tradicional ruada polo barrio con máscaras e músicos, que facía a súa entrada na praza das Eiroás pouco antes de dar inicio a Voda á 1 do mediodía.

Este ano, o papel de crego estivo interpretado por un comisionista que viña disposto a facturar a Voda, enviado por “San Chinchón“. Ao non traer guión, decidiu empregar o ChatGPT deixando en evidencia que sempre hai alguén agochado por tras da intelixencia artificial. A sorpresa deuna a noiva, que este ano viña “picada” (aínda que ela aseguraba que “só piqué 1 vez”) e o crego decidía non oficiar a cerimonia ante tamaña confesión. Para dilucidar se había voda ou non, contamos coa presenza de Carlos III, quen chegou á praza da man de Tamara Falcó para reivindicar o seus dereitos históricos sobre o cortello de Ourense, adquiridos por Xoan de Gante e Lancaster no S. XIV.
Para recibir a tan grande autoridade, o alcalde e o presidente da ourensanía pelexábanse entrando na praza con música do videoxogo Pac-man, despois de esquivaren as distintas obras da cidade, que “parece Jerson“. O presidente da Ourensanía poñía nas mans do alcalde a unha personaxe desmemoriada (Dori, de Dorense), que tiña a chave dos cartos públicos. Despois de lembrar a Rocío Dúrcal nas bocas do alcalde e do presidente da ourensanía, cantando “Tú querías que yo votara al PP” e “Ti querías que te fixera alcalde“, marcharon abrazados ao ritmo de “Cuando decidas tú volver“. previamente, Carlos III abandonaran a praza ante a presenza dun globo chinés (ou do chinés) enviado seguramente polo Putin.

Para rematar, e como ven sendo habitual, o noso garda-civil tentou ponher orde pola brava na cinzarrada iniciada pola veciña que reclamaba o pagamento da festa aos noivos, para posteriormente irrumpiren e as Pitas na escena co obxectivo de conciliar o pasado e o presente na procura dun futuro común.

Despois do xantar na carpa, tivo lugar o baile de disfraces, extendéndose até a última hora da tarde, momento no que o Meco baixou do poste da luz coa mesma axilidade que subira no Domingo fareleiro e procedimos a despedir o Entroido das Eiroás como ben se merece ate o vindeiro 28 de xaneiro de 2024.

Só queda dar as grazas. Grazas por estarmos outra vez na praza, desta vez sen ningún tipo de medidas nin protocolos. Grazas ao concello de Ourense por facilitar a celebración deste entroido, cos momentos de tensión incluidos, grazas ao Centro Comercial Ponte Vella e a BeOne polo seu apoio nos patrocinios e grazas ás veciñas e aos veciños que fixeron posible a festa co seu apoio e a súa complicidade. Grazas tamén a todas as persoas que nos acompañastes, do barrio ou doutros lugares, facéndonos sentir a sorte que temos de contar con veciñas e veciños en tantos outros lugares do mapa.

Podedes ver a continuación algunhas imaxes da xornada, amais dun video recompilatorio con diversos momentos desta 25ª edición e unha selección de fotos da Voda da Pita cedidas por Raquel Carreira.

A fin de semana do 2023

Ao longo da fin de semana participamos en distintos actos, dentro e fóra do barrio. O venres ás 12 do mediodía, as Pitas formaban parte do Desfile do CEIP Virxe de Covadonga. Un pouco máis tarde, cara as 20 h., percorrían a cidade vella de Ourense xunto ao Entroido de Seixalbo, ao Frei Canedo e a varias máscaras da provincia.

E o domingo, abríamos un ano máis o Desfile de Ourense. A continuación, un pequeno video do desfile escolar e algunhas imaxes dos outros momentos.

A Pita nas escolas

Nos prolegómenos do Entroido, tamén visitamos habitualmente distintos centros de ensino. Centramos a atención na escola amiga de cada ano que, neste 2023, foi o CEIP Mestre Vide, pero tamén asistimos a algún dos centros que nos convidan (sempre en menor número do que quixeramos, razón pola que vos pregamos paciencia).

Así, pois, o CEIP Mestre Vide recibiu a nosa visita para falar do Entroido e da Festa da Pita, amais de participar na decoración dunha parte das olas que escacharon na praza das Eiroás o pasado día 12. Dous días antes, unha representación das Pitas encargouse de recoller as olas no cole, amais de percorrer as aulas do centro. Velaquí algunha foto da xornada.

Por outra parte, tamén estivemos no CEIP Roberto Blanco Torres, da Peroxa, no CPI Antonio Faílde, de Cambeo e no IES Salvaterra de Miño, lugares todos eles nos que estivemos moi cómodos e aprendimos un pouco máis da nosa festa máis querida.

Por último, cómpre facer unha mención a algúns dos materiais que nos enviades cada ano sobre a máscara da Pita. Nesta ocasión queremos compartir a fantástica comadre que preparou Naila, e que nos fixo chegar a súa nai Laura Martínez Vázquez.

Oleiro 2023

Tarde espectacular, case primaveral, de olas, música e xogos nas Eiroás. Xa pasaba das 5 da tarde cando as Pitas e os músicos facían a entrada na praza das Eiroás levando o carro coas olas pintadas o día anterior polas nenas e polos nenos das Eiroás amais dos obradoiros realizados na Escola amiga deste 2023, o CEIP Mestre Vide e no Centro Comercial Ponte Vella algúns días antes.

A Pita lucía unha nova fita branca, querendo reflexionar sobre a necesidade que sigue tendo a nosa sociedade de darlle umha oportunidade á paz, amais de lembrar as batas brancas do persoal sanitario, que sigue vendo como se incrementan os recortes cada ano.

Mentres as olas voaban pola praza, na procura dunha man amiga que as apañara antes de escacharen no chan, as mozas e mozos máis xoves xogaban con globos e mesmo probaban algunha ola, por ir afacéndose ao tacto. Cara o fin da xornada, e antes de comezar a última roda, foi o Manolo Guimarey (o mesmo neto do Antonio Guimarey) quen propuxo salvar esa última ola e que fora a primeira da vindeira edición, no 2024. E así quedou instaurado, quen sabe se un novo costume da nosa festa.

Velaquí algunhas imaxes da xornada.

As Pitas levarán outra fita branca

A cor escollida para engadir á perfura daquelas Pitas que corran o Entroido deste ano 2023 é a BRANCA. Con esta cor queremos reflexionar sobre a necesidade que sigue tendo a nosa sociedade de darlle umha oportunidade á paz, como cantaba Lennon hai xa 50 anos. Na actualidade existen máis de medio cento de guerras e conflitos armados ao redor do planeta, que causan mortes e dor innecesarias. A recente invasión de Ucraína por parte de Rusia, nunha guerra que xa dura case 10 anos, veu a constatar a dependencia global tanto no ámbito social como económico ou cultural, que temos todos os pobos do mundo ante un conflito tan inxusto e inútil como é unha guerra.

Por outra parte, con esta cor tamén queremos lembrar ás batas brancas do persoal sanitario, que despois de recoller aplausos diarios na recente pandemia sigue vendo como se recortan ano tras ano, os recursos para a sanidade pública, provocando o colapso nos centros de saúde e nos servizos de urxencia. E, ademais, levará un “X” para marcar no almanaque multicor do noso traxe o nacemento dunha nova filla na comunidade da Pita.

Hoxe domingo, contra as 5 da tarde, poderanse ver ás primeiras Pitas que corran o Entroido deste ano levando as olas á praza das Eiroás. As máis “vellas” portarán 2 fitas brancas na súa perfura: a que representa ao primeiro ano (2002) e a escolllida neste 2023.

Podes consultar aquí as cores de todos os anos.

Fareleiro 2023

O domingo 5 arrincaba o Entroido nas Eiroás e en todo o termo municipal de Ourense. Facíao xa pola mañá, coa chegada do Meco á praza para proceder á posterior recepción por parte das autoridades do barrio Acompañaban ao encargado de presidir a praza nas vindeiras semanas, os seus asesores de imaxe e un nutrido grupo de veciñas e veciños que non quixeron perderse evento de tanto glamour. Foi un espectáculo ver con que gracianatural trepaba pola farola para encaramarse ao máis alto da praza e ocupar o lugar de honra que ben merece tan alta distinción..

Xa de tarde, o sol non quixo perderse este inicio dun Entroido que volta -porfin- sen protocolos nin limitacións. Velaquí algunhas imaxes da xornada.

Programa da festa 2023

Agora si, xa sen máscaras nin limitacións de aforo, chega o Entroido a Ourense. E un ano máis, o barrio das Eiroás inaugura o Entroido e unha nova edición da Festa da Pita coa celebración do Domingo Fareleiro.

Así, o vindeiro domingo día 5 dará comezo comezo a festa. A 25ª edición da Festa da Pita conta coas benzóns e as licencias oportunas das autoridades do barrio, que agardan pola chegada do Meco pouco antes do xantar do domingo, para dar saída á celebración do Entroido en todo o termo municipal. Alén da participación nos desfiles da cidade (o día 19) e do CEIP Virxe de Covadonga (o día 17) e doutras actividades promocionais e divulgativas, o programa deste ano nas Eiroás é o seguinte:

Imaxe da Festa da Pita 2023

A Festa da Pita fai 25 anos. E xa temos o cartel para esta edición “de prata”. Nesta ocasión, chega asinado polo ilustrador e profesor de deseño gráfico da EASD Antón Faílde, Cosme, quen nos propón un deseño sobre a parte superior da carauta da Pita realizado nas 3 cores que enchen cada parte da nosa máscara. Irrumpe así a Pita no espazo festivo representado polas cores curvilíneas espallando ledicia en forma de pequenas plumas de cores.

Moitas grazas, Cosme, pola túa colaboración. Aquí podedes ver os seus traballos.
E se queredes, podedes ver os carteis doutras edicións, mentres non subimos o programa da festa deste ano, que dará comezo o vindeiro domingo, día 5.

Imaxe da Festa da Pita 2022

Xa temos cartel para a 24ª edición da Festa da Pita e chega asinado por un amigo da festa, que xa colaborara con nós no ano 2009. Trátase de Rober, que nos propón algo así como un cartaz disfrazado. Sobre unha base na que xoga con deformacións na procura de transmitir o efecto de movemento, emprega materiais que lembran a ese apartado gastronómico -tan presente no Entroido- que se disfrazan dumha persoa disfrazada, ou mellor dito, vestida, de Pita, que non deixa de ser o elemento que diferencia á nosa festa.
Moitas grazas, Rober, pola túa colaboración. Aquí ou aquí podedes ver os seus traballos.
Se queredes, podedes ver os carteis doutras edicións, mentres non subimos, na xornada de mañá xoves, o programa da festa deste ano, que dará comezo o vindeiro domingo, día 13.

Praza virtual das Eiroás

O Martes sempre é o día grande nas Eiroás. E este ano, non só tivo lugar a voda, senón que tamén tiveron lugar outras intervencións e tamén recollemos outras iniciativas ao redor da festa que nos fixestes chegar. Xa pola mañá, unha Pita visitaba o CHUO para agradecer ás traballadoras e aos traballadores da Sanidade pública a súa adicación durante esta pandemia, amais de lembrarlles que estabamos no Entroido. Despois tiña lugar a voda en formato de multichamada e xa de tarde enteirámonos que as veciñas e os veciños da Rúa Lopez Ferreiro, moi activos nesta festa, ían queimar a sardiña e despedir o Entroido.