Oleiro 2023

Tarde espectacular, case primaveral, de olas, música e xogos nas Eiroás. Xa pasaba das 5 da tarde cando as Pitas e os músicos facían a entrada na praza das Eiroás levando o carro coas olas pintadas o día anterior polas nenas e polos nenos das Eiroás amais dos obradoiros realizados na Escola amiga deste 2023, o CEIP Mestre Vide e no Centro Comercial Ponte Vella algúns días antes.

A Pita lucía unha nova fita branca, querendo reflexionar sobre a necesidade que sigue tendo a nosa sociedade de darlle umha oportunidade á paz, amais de lembrar as batas brancas do persoal sanitario, que sigue vendo como se incrementan os recortes cada ano.

Mentres as olas voaban pola praza, na procura dunha man amiga que as apañara antes de escacharen no chan, as mozas e mozos máis xoves xogaban con globos e mesmo probaban algunha ola, por ir afacéndose ao tacto. Cara o fin da xornada, e antes de comezar a última roda, foi o Manolo Guimarey (o mesmo neto do Antonio Guimarey) quen propuxo salvar esa última ola e que fora a primeira da vindeira edición, no 2024. E así quedou instaurado, quen sabe se un novo costume da nosa festa.

Velaquí algunhas imaxes da xornada.

Domingo Oleiro 2021

E segue adiante este Entroido dixital que, aínda que moi lonxe do acostumado, está deixándonos algún momento ben xeitoso. Neste Domingo Oleiro, quixemos compartir unha ola con vós através das redes, á parte de recoller diversas participacións atrevidas e curiosas. Amais dunha teatralización e das rodas familiares co xogo da ola, atopamos unha casa no Val do Regueiro na que instalaron o Meco ou unha rúa enteira, a López Ferreiro, cuxa veciñanza tan activa neste tempo de pandemia decorou para este tempo de Entroido.

Domingo Oleiro 2020

Moi boa tarde de olas, música e xogos nas Eiroás, que a choiva respectou até o fin da xornada. Eran ao redor das 5 da tarde cando as Pitas e os músicos facían a entrada na praza das Eiroás levando o carro coas olas pintadas o día anterior polas nenas e polos nenos das Eiroás amais dun obradoiro realizado no CEIP Virxe de Covadonga algúns días antes.

A Pita lucía unha nova fita vermella, chamando a atención sobre a necesidade de crer en proxectos comúns fundamentados no diálogo e non na confrontación.

Mentres as olas voaban pola praza, na procura dunha man amiga que as apañara antes de escacharen no chan, as mozas e mozos máis xoves xogaban con globos e mesmo probaban algunha ola, por ir afacéndose ao tacto. Xa con todas as olas escachadas, os anacos de barro cocido tiveron un novo uso, creando espazos de xogo sobre o chan da praza. Velaquí algunhas imaxes da xornada.

Domingo Oleiro 2019

Tarde de sol e olas a do pasado domingo nas Eiroás, que nos fai pensar -iso si- nun Entroido un chisco mollado, se atendemos ao refraneiro galego.

Eran ao redor das 5 da tarde cando as Pitas e os músicos facían a entrada na praza das Eiroás levando o carro coas olas pintadas o día anterior polas nenas e polos nenos das Eiroás amais dun obradoiro realizado na Ludoteca da Ponte algúns días antes.

Mentres as persoas máis xoves xogaban con globos e mesmo con cuncas de barro, as máis maiores ían dando conta das olas que voaban polo ceo das Eiroás procurando unha man amiga que as apañara antes de escachar. Velaquí algunhas imaxes da tarde.

Domingo Oleiro

Este pasado domingo, un ano máis, chegaban as olas á praza das Eiroás da man das Pitas. Estas -ademais- eran as encargadas de xogar a primeira ola e ir introducindo o xogo entre as persoas asistentes.
Nesta ocasión, non temos moitas imaxes da xornada. De todos xeitos, queremos compartir con vós estas poucas.

Así foi o Domingo Oleiro

Xa ten chovido algo desde aquela primeira edición na que un pequeno grupo de veciñas e veciños do barrio, acompañados polos amigos da xa tristemente desaparecida Agrupación Folclórica Foula, xogaban até escachar as 6 olas de barro e algunha que outra cunca do mesmo material.
Onte, 18 anos despois daquel 7 de febreiro do 1999, eran 60 as olas chegadas do Alto do Couso que protagonizaron unha xornada soleada e moi agradábel na praza das Eiroás.

Acompañáronnos algúns mozos e mozas das novas Escolas amigas da Pita e a Charanga Os Chispas, que amenizou musicalmente a tarde. Gozamos pois dun bon ambiente, dun clima desenfadado e das primeiras mascaradas que se puideron ver polo barrio.

Domingo Oleiro

Hoxe domingo poderemos ver as primeiras Pitas nas Eiroás. Estas máscaras máis madrugadoras serán as encargadas de achegar o carro das olas á praza, onde terá lugar o xogo que centra a actividade da xornada de hoxe no barrio. Este ano contaremos con olas decoradas por escolares das novas Escolas amigas da Pita: CEIP Manuel Luis Acuña e CEIP O Couto, ademáis das mozas e mozos das Eiroás. Nos vindeiros días, iremos subindo ao apartado das escolas amigas un resumo de imaxes das visitas a estes centros.

Será apartir das 5 da tarde cando o carro das olas entre na praza, acompañado das Pitas e da Charanga Os Chispas, que amenizará o xogo de pequenos e maiores ao longo da tarde.

COR DA FITA

A cor escollida neste 2017 para pendurar do broche das fitas é o MARRÓN, co que queremos chamar a atención sobre a importancia das migracións humanas e do diálogo intercultural para a evolución e a mellora da especie. Marrón porque nos acerca aos ciclos vitais, á terra, á natureza… lémbranos cuais son as nosas raíces, as nosas orixes e fainos recapacitar cobre as pouquísimas cousas que en realidade son imprescindibles e necesarias.

O ensino público no broche da Pita

O vindeiro domingo poderemos ver as primeiras Pitas nas Eiroás. Estas primeiras máscaras serán as encargadas de levar o xa habitual carro das olas até a praza, onde terá lugar o xogo que centra a actividade deste Domingo Oleiro no noso barrio. Este ano contaremos con olas decoradas por escolares das novas Escolas amigas da Pita: CEIP As Mercedes, CEIP Curros Enríquez e CEIP Manuel Sueiro, ademáis das mozas e mozos das Eiroás.

Estaremos acompañados da Charanga Os Chispas e, ao rematar nas Eiroás, imos levar a “proba das olas” ao centro da cidade, concretamente á praza do Correxedor, onde temos programado o concerto do grupo A Troba do bugallo, despois de estrear a céntrica praza como espazo de xogo para as nosas olas.

COR DA FITA

A nova cor que pendurará do broche da Pita neste ano 2016 será a VERDE CLARA, coa que queremos facer fincapé na defensa do ensino público, despois de ter sido unha das propostas de cor nos últimos anos e ante a continuidade dun modelo que semella ir encamiñado cara a precarización dos servizos públicos e de calidade.

Nos últimos anos vimos sufrindo con cada mudanza no governo a elaboración dunha lei educativa diferente leis que nos achegan cada vez máis á “escola da ignorancia”.

É importante lembrar que o ensino público é o único que garante a educación en igualdade entre homes e mulleres, o verdadeiramente intercultural e realmente aberto; o que mira cara adiante sen medo e para ben. É o que non serve de distincións caducas baseadas na clase social, o lugar de orixe ou a relixión para se distinguir. É ademáis o que conta con máis e mellores profesionais e recursos para o seu alumnado. Por estes motivos nos sumamos á defensa do ensino público, posto que o este é o modelo que promove o dereito fundamental e democrático dunha educación universal gratuita e de calidade, baseada nos valores do progreso e na xustiza social.

Podedes ver aquí todas as cores que penduran do broche de coiro da nosa máscara, así como o ano e os motivos que representan.

Olas no Correxedor

Vindeiro domingo 31 terá lugar o Domingo Oleiro nas Eiroás. E nesta edición queremos dar un paso máis á hora de compartir a nosa festa coas veciñas e veciños do resto da cidade.

Cando no ano 1999 botabamos a andar coa Festa da Pita, procurando incardinar o programa da nova festa dentro do ciclo tradicional galego, atendiamos a diversos etnógrafos como Taboada Chivite que indicaban que o xogo das olas tiña lugar na cidade de Ourense o Domingo Corredoiro ou o Xoves de Comadres. Foi este un dos principais motivos polos que nas Eiroás celebramos este domingo e -xunto a Seixalbo- seguimos facendo boas as palabras do etnógrafo verinés.

Hoxe, 17 edicións máis tarde, queremos levar algunhas olas directamente desde a praza das Eiroás até a praza do Correxedor. Non é máis ca unha proba, un chiscar de ollos para convidar á veciñanza da cidade a probar o xogo que vai protagonizar a xornada do domingo 31 nas Eiroás.

E farémolo coa colaboración do Café Cultural Auriense e do grupo A Troba do bugallo, que nos ofrecerán un concerto festivo despois das 8 e media do serán.

Oliñas veñen e van

Un ano máis, as olas escacharon na praza das Eiroás. Unha tarde de domingo fría pero soleada permitiu que a veciñanza puidera achegarse á praza para participar desta xornada lúdica; iso si, máis como espectadores que como participantes do xogo.

Gozamos pois dun bon ambiente, desenfado e as primeiras mascaradas que se puideron ver no barrio.

Este ano, as olas estaban decoradas por escolares do CPR Divino Maestro e por nenas e nenos do barrio, que se achegaron até o local social na tarde do sábado.

Como de costume, foron as primeiras Pitas do ano as que trouxeron o carro das olas até a praza. E fixérono lucindo a fita pola liberdade de expresión que representa ao ano 2015, ademáis de seren as encargadas de abrir o tradicional xogo das olas.

Despois, olas grandes, olas pequenas e globos de auga voaron e escacharon no chan, mentres soaba a Charanga Os Chispas, que lle aportou a sonoridade e a musicalidade a esta fermosa tarde. Eis algunhas imaxes das xornadas do sábado e do domingo: