A fin de semana do 2023

Ao longo da fin de semana participamos en distintos actos, dentro e fóra do barrio. O venres ás 12 do mediodía, as Pitas formaban parte do Desfile do CEIP Virxe de Covadonga. Un pouco máis tarde, cara as 20 h., percorrían a cidade vella de Ourense xunto ao Entroido de Seixalbo, ao Frei Canedo e a varias máscaras da provincia.

E o domingo, abríamos un ano máis o Desfile de Ourense. A continuación, un pequeno video do desfile escolar e algunhas imaxes dos outros momentos.

A Pita nas escolas

Nos prolegómenos do Entroido, tamén visitamos habitualmente distintos centros de ensino. Centramos a atención na escola amiga de cada ano que, neste 2023, foi o CEIP Mestre Vide, pero tamén asistimos a algún dos centros que nos convidan (sempre en menor número do que quixeramos, razón pola que vos pregamos paciencia).

Así, pois, o CEIP Mestre Vide recibiu a nosa visita para falar do Entroido e da Festa da Pita, amais de participar na decoración dunha parte das olas que escacharon na praza das Eiroás o pasado día 12. Dous días antes, unha representación das Pitas encargouse de recoller as olas no cole, amais de percorrer as aulas do centro. Velaquí algunha foto da xornada.

Por outra parte, tamén estivemos no CEIP Roberto Blanco Torres, da Peroxa, no CPI Antonio Faílde, de Cambeo e no IES Salvaterra de Miño, lugares todos eles nos que estivemos moi cómodos e aprendimos un pouco máis da nosa festa máis querida.

Por último, cómpre facer unha mención a algúns dos materiais que nos enviades cada ano sobre a máscara da Pita. Nesta ocasión queremos compartir a fantástica comadre que preparou Naila, e que nos fixo chegar a súa nai Laura Martínez Vázquez.

As Pitas levarán outra fita branca

A cor escollida para engadir á perfura daquelas Pitas que corran o Entroido deste ano 2023 é a BRANCA. Con esta cor queremos reflexionar sobre a necesidade que sigue tendo a nosa sociedade de darlle umha oportunidade á paz, como cantaba Lennon hai xa 50 anos. Na actualidade existen máis de medio cento de guerras e conflitos armados ao redor do planeta, que causan mortes e dor innecesarias. A recente invasión de Ucraína por parte de Rusia, nunha guerra que xa dura case 10 anos, veu a constatar a dependencia global tanto no ámbito social como económico ou cultural, que temos todos os pobos do mundo ante un conflito tan inxusto e inútil como é unha guerra.

Por outra parte, con esta cor tamén queremos lembrar ás batas brancas do persoal sanitario, que despois de recoller aplausos diarios na recente pandemia sigue vendo como se recortan ano tras ano, os recursos para a sanidade pública, provocando o colapso nos centros de saúde e nos servizos de urxencia. E, ademais, levará un “X” para marcar no almanaque multicor do noso traxe o nacemento dunha nova filla na comunidade da Pita.

Hoxe domingo, contra as 5 da tarde, poderanse ver ás primeiras Pitas que corran o Entroido deste ano levando as olas á praza das Eiroás. As máis “vellas” portarán 2 fitas brancas na súa perfura: a que representa ao primeiro ano (2002) e a escolllida neste 2023.

Podes consultar aquí as cores de todos os anos.

Domingo Oleiro 2021

E segue adiante este Entroido dixital que, aínda que moi lonxe do acostumado, está deixándonos algún momento ben xeitoso. Neste Domingo Oleiro, quixemos compartir unha ola con vós através das redes, á parte de recoller diversas participacións atrevidas e curiosas. Amais dunha teatralización e das rodas familiares co xogo da ola, atopamos unha casa no Val do Regueiro na que instalaron o Meco ou unha rúa enteira, a López Ferreiro, cuxa veciñanza tan activa neste tempo de pandemia decorou para este tempo de Entroido.

Domingo Fareleiro 2021

O 31 de xaneiro de 1999 botaba a andar a Festa da Pita. Sobre a base do Entroido, disque froito dunha cinzarrada, que se celebrara no barrio medio século atrás, decidimos comezar con unha proposta adaptada aos tempos, na procura de conformar un novo elemento identitario para o barrio, amais de ampliar a oferta cultural e lúdica. Casualidades da vida, 22 anos despois, atopámonos con este reto de non deixar de celebrar unha festa -que en si mesma é unha explosión dos sentidos- sen sentirnos perto. E facémolo no ano no que o programa marca as mesmas datas que aquela primeira edición.

#FestaDaPita2021

Hoxe 31 de xaneiro, domingo de septuaxésima no calendario litúrxico e penúltima lúa chea do inverno, daría comezo nas Eiroás o noso particular ciclo do Entroido. Faríao coa celebración do Domingo Fareleiro, despois de que o Meco fora acompañado polas veciñas e veciños a ocupar o punto máis alto da praza.

Isto sería así de non ser polas circunstancias que xa todas e todos sabemos abondo e que non imos repetir aquí. A estas alturas xa temos (ou deberiamos ter) máis que claro cal é a situación, e canto de necesaria é agora unha actitude responsable que nos protexa e que coide de toda a comunidade, principalmente das persoas máis vulnerables… daquelas que coidaron de nós.

Contodo, non estamos dispostos a converter o Entroido nun laio continuo polo que non podemos facer. Ao contrario, queremos pescudar outras propostas que nos permitan vivir -dun xeito distinto, por este ano- a nosa festa máis querida.

Este ano imos ter a oportunidade de demostrar que levamos o Entroido por dentro. E tamén poderemos comprobar que somos quen facelo desde dentro das nosas casas ou nas nosas unidades familiares. Con disfraces, coplas, parrafeos, contos… ou simplesmente coa vosa presenza, sen dúbida de porte maxestoso e singular beleza. Desta vez, a rede e as plataformas dixitais serán o torreiro da festa e o espazo no que entroidar co resto da comunidade.

Queremos propoñervos que compartades os vosos videos de Entroido nos vosos perfís de redes sociais empregando o cancelo #FestaDaPita2021, ou -se preferides- enviedes o arquivo ao noso correo electrónico: festa.da.pita@gmail.com.

Recompilaremos todo o que fagades para compartilo no noso torreiro virtual, que será a nosa propia canle no youtube. As datas nas que subiremos os contidos que enviedes coincidirán cos días habituais do programa que habitualmente conforma a nosa festa (neste ano, o 31 de xaneiro, 7, 13 e 16 de febreiro).

A maiores, xa aproveitamos para convidarvos á Voda da Pita do 2021, que aínda non sabemos ben como será pero… dalgún xeito ha de ser. Como sempre, será o martes 16 á 1 do mediodía na praza (virtual, neste ano) das Eiroás.

Construide con nós o Entroido dixital do 2021.

Domingo Oleiro 2020

Moi boa tarde de olas, música e xogos nas Eiroás, que a choiva respectou até o fin da xornada. Eran ao redor das 5 da tarde cando as Pitas e os músicos facían a entrada na praza das Eiroás levando o carro coas olas pintadas o día anterior polas nenas e polos nenos das Eiroás amais dun obradoiro realizado no CEIP Virxe de Covadonga algúns días antes.

A Pita lucía unha nova fita vermella, chamando a atención sobre a necesidade de crer en proxectos comúns fundamentados no diálogo e non na confrontación.

Mentres as olas voaban pola praza, na procura dunha man amiga que as apañara antes de escacharen no chan, as mozas e mozos máis xoves xogaban con globos e mesmo probaban algunha ola, por ir afacéndose ao tacto. Xa con todas as olas escachadas, os anacos de barro cocido tiveron un novo uso, creando espazos de xogo sobre o chan da praza. Velaquí algunhas imaxes da xornada.

Os migrantes na fita do 2019

A cor escollida para engadir á perfura daquelas Pitas que corran o Entroido deste ano 2019 é o AZUL “europea”. Con esta cor queremos reflexionar sobre as migracións masivas de persoas que chegan das rexións máis empobrecidas e con maior número de conflitos bélicos do planeta, provocados pola usurpación que facemos dos seus recursos e polos golpes de Estado promovidos polos “países ricos”, e que están convertindo o Mediterráneo na grande foxa común da vergoña.

Estamos deixando morrer ás nais, aos pais, irmás e irmáns de quenes van conformar a cidadanía da futura Unión Europea.

Se non queremos que as nosas fillas e os nosos fillos teñan que avergoñarse e renegar de nós dentro de 2 ou 3 décadas, por ter deixado morrer a milleiros de nenas e nenos na porta das nosas casas, imos ter que ir poñéndonos as pilas e reorganizar a orde de prioridades na xestión do público, situando o dereito á vida por enriba da protección ao sistema financeiro.

Podes consultar aquí as cores de todos os anos.

Programa 2019

Velaí ven o Entroido. E -como non- nas Eiroás chega unha nova edición da Festa da Pita, que xa suma 21 edicións. Este ano, a primeira lúa da primavera fai que vaiamos gozar dun Entroido un chisco máis serodio do habitual e -ben seguro- con moita máis gana de festa. Arrinca a festa o domingo 17, contando coas benzóns e as licencias oportunas das autoridades do barrio e sabendo que este ano o Meco contará coas veciñas e veciños do barrio como asesores de imaxe. Pero iso será o domingo, pouco antes do xantar, cando deamos saída á celebración do Entroido en todo o término municipal do concello de Ourense. Para alén da participación no desfile da cidade ou doutras actividades promocionais e divulgativas, o programa deste ano nas Eiroás segue a tónica das edicións anteriores, consistindo no seguinte:

Domingo Oleiro

Este pasado domingo, un ano máis, chegaban as olas á praza das Eiroás da man das Pitas. Estas -ademais- eran as encargadas de xogar a primeira ola e ir introducindo o xogo entre as persoas asistentes.
Nesta ocasión, non temos moitas imaxes da xornada. De todos xeitos, queremos compartir con vós estas poucas.