Praza virtual das Eiroás

O Martes sempre é o día grande nas Eiroás. E este ano, non só tivo lugar a voda, senón que tamén tiveron lugar outras intervencións e tamén recollemos outras iniciativas ao redor da festa que nos fixestes chegar. Xa pola mañá, unha Pita visitaba o CHUO para agradecer ás traballadoras e aos traballadores da Sanidade pública a súa adicación durante esta pandemia, amais de lembrarlles que estabamos no Entroido. Despois tiña lugar a voda en formato de multichamada e xa de tarde enteirámonos que as veciñas e os veciños da Rúa Lopez Ferreiro, moi activos nesta festa, ían queimar a sardiña e despedir o Entroido. Seguir lendo

Voda da Pita 2021

22 anos tiveron que pasar desde a primeira representación na praza das Eiroás, para que chegara esta edición dixital a lembrarnos que o Entroido sabe abrirse un oco e sortear as circunstancias máis adversas.

Pasaban uns minutos da 1 da tarde cando a nosa canle do youtube estreaba esta #VodaDaPita2021, co “concelleiro da Voda da Pita” en pantalla, medio despistado e contándonos que tiña que sumar esta nova concellaría ás outras 9 que xa ostentaba. Como representante do concello dorense, capital internacional da intelixencia artificial, adicouse a dar consellos smart e digital ao longo de toda a voda. Despois dun breve saúdo da monxa que asistiu a cerimonia no ano pasado, apareceu o crego, o youtuber AndorranusOMG, quen se apresurou a comezar a cerimonia pois aínda tiña que pendurar un par de partidas nas súas canles dixitais. Seguir lendo

Martes de Entroido 2020

A mañá do martes veu con certa timidez, deixando caír algo de auga por momentos e provocando que tiveramos que activar un plan B a última hora para poder levar a cabo a Voda da Pita sen problemas de seguridade derivados da sonorización do evento. Así as cousas, tivo que chegar o ano no que non demos cumprido a puntualidade eiroasense (que xa lle disputaba prestixio á puntualidade inglesa) no inicio da Voda da Pita ás 13 h.
A xornada comezaba despois das 11.30 h. con unha ruada de Pitas e músicos polo barrio, anunciando a chegada do día grande. Un cuarto de hora despois da 1 do mediodía daba comezo a representación teatral popular que, en ton satírico, rememora como foron as orixes da nosa festa, amais de lembrar, con moito agarimo e respecto ás 2 persoas que protagonizaran aquela cinzarrada na metade do século pasado. Desde que comezamos coa celebración actual da Festa da Pita, o Antonio e a Gumersinda levan casando 21 anos, dun xeito desenfadado e con moitos símbolos no argumento que procuran unha reconciliación co pasado, fechando as feridas existentes na procura dun futuro mellor para a comunidade. Seguir lendo

Martes de Entroido 2019

A choiva deu unha tregua na mañá do martes para podermos celebrar a 20ª edición da Voda da Pita no seu espazo natural, co pazo das Eiroás como fondo de escenario. A xornada comezaba coa ruada de Pitas e músicos polo barrio, anunciando a chegada do día grande. Á 1 en punto do mediodía daba comezo a representación teatral popular que, en ton satírico, rememora como foron as orixes da nosa festa, amais de lembrar, con moito agarimo e respecto ás 2 persoas que protagonizaran aquela cinzarrada na metade do século pasado. Desde que comezamos coa celebración actual da Festa da Pita, o Antonio e a Gumersinda levan casando 20 anos, dun xeito desenfadado e con moitos símbolos no argumento que procuran unha reconciliación co pasado, fechando as feridas existentes na procura dun futuro mellor para a comunidade.

Seguir lendo

Programa 2019

Velaí ven o Entroido. E -como non- nas Eiroás chega unha nova edición da Festa da Pita, que xa suma 21 edicións. Este ano, a primeira lúa da primavera fai que vaiamos gozar dun Entroido un chisco máis serodio do habitual e -ben seguro- con moita máis gana de festa. Arrinca a festa o domingo 17, contando coas benzóns e as licencias oportunas das autoridades do barrio e sabendo que este ano o Meco contará coas veciñas e veciños do barrio como asesores de imaxe. Pero iso será o domingo, pouco antes do xantar, cando deamos saída á celebración do Entroido en todo o término municipal do concello de Ourense. Para alén da participación no desfile da cidade ou doutras actividades promocionais e divulgativas, o programa deste ano nas Eiroás segue a tónica das edicións anteriores, consistindo no seguinte: Seguir lendo

Martes de Entroido

martes2017_115Alá foi outra edición da festa. Xa son 19 anos botando foguetes e tentando crear/recuperar unha identidade cultural, festiva e lúdica para o noso barrio. Malia as condicións meteorolóxicas non axudaron nada, podemos facer unha valoración positiva sobre a participación no global da festa.
No que atinxe ao día grande, a choiva e o vento, presentes durante toda a mañá nas Eiroás, axudáronnos a decidir a mesma ubicación do ano anterior para a cerimonia do Martes. Desta non cumpriu verniz hidrófugo, malia unha das tres partes da nosa Trindade chegouse a sentir tocado polo tempo en varias ocasións. Seguir lendo

Martes de Entroido

IMGP6381Nin a choiva nin as ordes ministeriais puideron coa festa. O Martes de Entroido poñía -un ano máis- punto e á parte á Festa da Pita. Un día que comezaba pola mañá cun percorrido de músicas e máscaras polo barrio anunciando a chegada do día grande e convocando á veciñanza na Praza das Eiroás onde, un pouco máis tarde do habitual, tiña lugar a Voda da Pita, cargada este ano de convidados especiais e mesmo dalgunha sorpresa. A Infanta Cristina ou o intérprete de lingua de signos nos funerais de Mandela facíanse sitio nunha representación que -despois de todo o falado nas última semanas sobre a Orde Ministerial que regulaba o uso do uniforme de garda-civil- contou con dous axentes a falta de un. Chegaba así até As Eiroás un axente da Benemérita para reclamar o cumprimento da nova Orde e multar á personaxe que tradicionalmente ten o seu papel na representación, requisándolle o traxe e provocando que seguira a obra en panos menores. Estade atentas/os, porque nas vindeiras semanas, subiremos a representación completa para quen non puido asistir ou lle colleu medo á auga.

Despois veu o xantar e, xa pola tarde, o baile de máscaras e concurso de disfraces, que se foi animando máis e máis conforme ía avanzando o día até rematar despedindo o Entroido do xeito que vimos facendo nas Eiroás desde hai 16 anos, é dicer, queimando o Meco (Meca, este ano). Eis as imaxes dalgúns momentos da xornada: Seguir lendo

A voda da Pita

CIMG1453Hai unhas semanas sorprendeunos a última nova chegada desde Madrid limitando dun xeito taxante (por non empregar outra expresión) os usos do uniforme de garda-civil. Despois dun primeiro momento no que ninguén podía crer que este regulamento fora verdade (como se non houbera cousas das que ocuparse ben máis importantes e urxentes), fomos encaixando pouco a pouco a OM 77/2014, con pesar -polo que parece representar- mais tamén con humor.

Dentro da Voda da Pita, que celebramos o Martes de Entroido na praza d’As Eiroás, o personaxe do garda-civil constitúe pouco o símbolo daquela autoridade que detivo a festa en máis dunha ocasión (nos anos 60) e que coa chegada da democracia (representada na propia obra polas Pitas, símbolo da festa recuperada), se reconcilia e participa co pobo da súa vida e das súas celebracións.

Ante este panorama, comezaron as propostas de “renovación” do personaxe mentres -de xeito paralelo- solicitamos a autorización para o uso do uniforme de garda-civil na nosa obra, atendendo ao artigo 7.3 da Orde Ministerial.

Non sabemos aínda que nos van respostar, nin siquer sabemos se nos van respostar… Nin está claro aínda o que pasará co garda-civil o Martes. O que si temos claro, é que a voda vai ter lugar -como sempre- ás 13 horas do vindeiro martes de Entroido, e este ano aínda cun pouco máis de ganas.

Agardamos que non se lles dea tamén por prohibir tamén os uniformes de médicos, militares, enfermeiras/os e curia, porque entón ou acaban co Entroido ou acabamos nós con eles. Aquí vos deixamos un teaser da voda, gravado no ensaio do pasado fin de semana.

Voda da Pita 2010

Eis a reportaxe de video da Voda da Pita do ano pasado, do 2010, realizada por un bon profesional e amigo da festa: José Antonio L. Feijóo.

Trátase dun pequeno resumo, mais seguro que serve para lembrarnos como foi a xornada.

Así foi o Día grande

E rematou unha nova edición da Festa da Pita. E van 13. Mesmo sentimos algo de vértixe ao pensar na primeira ou nas primeiras edicións, no ano 1999 e nas numerosas anécdotas, traballos, loitas, noites no local social, conversas cos veciños e coas veciñas que participaran no entroido (daquela Carnaval) de mediados do século pasado…

O caso é que o Martes de Entroido do 2011 chegou traendo a primavera por adiantado. A xornada comezaba pola mañá con un percorrido polo barrio de Pitas e músicos anunciando a chegada do día grande. Ás 13 h. tivo lugar, un ano máis,  a Voda da Pita, coa participación de veciñas e veciños, á que seguiu o convite habitual, onde as distintas familias e grupos asistentes compartillaron un momento gastronómico e festivo.

Xa de tarde, houbo espazo para os disfrazes e o baile, até a despedida do Entroido coa queima do Meco, que tivo lugar nesta ocasión xa ben entrada a noite.

Achegamos a continuación algunhas fotos da xornada

Seguir lendo