Martes de Entroido 2024

Sen dubida, ha de haber días en maio que non faga un tempo como o que tivemos este Martes de Entroido nas Eiroás. Xa coa Karlotta desfeita, unhas pingotas ameazaron choiva pola mañá cedo, pero axiña abriu o sol, permitindo que as veciñas e os veciños puideran vivir o día grande como ben se merece.
Comezaba a xornada coa tradicional ruada polo barrio con máscaras e músicos, que facía a súa entrada na praza das Eiroas pouco antes de dar inicio á Voda á 1 do mediodía.

Este ano, e por se alguén estaba falto de ideas, o goberno da Xunta quixo colocarnos unha campaña electoral no medio do Entroido, o que provocou que a praza das Eiroás estivera moi concurrida, tanto por uns como por outros.

Arrincaba a Voda -que este ano chegaba á súa 25ª edición- coa visita de Baltar, que viña a despedirse deste barrio e desta Voda na que tantas veces participara, ao tempo que recibía de Jácome unha proposta para pechar un pre-acordo electoral arredor duns cubatas e uns conguitos.
Pasaba máis tarde pola praza Sito Rueda, na procura dalgún voto -que este ano, non sobra ningún- e minimizando os pellets de plástico, ao tempo que llos botaba ás pombas.
Posteriormente, a mesmísima vicepresidenta do goberno, Yolanda Díaz, entraba ao son da famosa canción de Pablo Milanés, para solventar as dúbidas do cura á hora de casar a dous viúvos que xa se estrenaran no pallar do Sisto.
Máximo Decimo Besteiro e Ana Pontón tamén se achegaron xuntos para seren testigos do lonxe que está chegando o granulado de plástico e -de paso- mirar se recollían algún voto canda as boliñas.
Anteriormente, Tito Feijoo entraba vía telefónica para prometer calquera cousa que non acababa de entenderse polas interferencias.

Para rematar, o garda-civil Rubiales tentou poñer orde pola brava na cinzarrada iniciada pola veciña Jennifer la hermosa, que reclamaba o pagamento da festa aos noivos, para posteriormente irrumpiren as Pitas na escena co obxectivo de conciliar o pasado e o presente na procura dun futuro común.

Despois do xantar na carpa, tivo lugar o baile de disfraces, extendéndose até a última hora da tarde, momento no que o Meco baixou do poste da luz coa mesma axilidade que subira no Domingo fareleiro e procedimos a despedir o Entroido das Eiroás como ben se merece até o vindeiro 16 de febreiro de 2025.
Só queda dar as grazas. Grazas por participardes e por facer posible a festa. Grazas ao concello de Ourense por facilitar a celebración deste entroido, grazas ao BeOne e ao Centro Comercial Ponte Vella, polo seu apoio nos patrocinios e grazas ás veciñas e aos veciños que fixeron posible a festa co seu apoio e a súa complicidade. Grazas tamén a todas as persoas que nos acompañastes, do barrio ou doutros lugares, facéndonos sentir a sorte que temos de contar con veciñas e veciños en tantos outros lugares do mapa.
Podedes ver a continuación algunhas imaxes da xornada, boa parte delas cortesía da Raquel Carreira.

A fin de semana de 2024

Nos días gordos do Entroido, a festa e a Pita ten distintos momentos, participando en distintos actos, dentro e fóra do barrio. Este ano, por mor da alerta marela provocada pola borrasca Karlotta, suspendeuse o desfile do pregón do Entroido, programado para o venres, pero si tivo lugar o desfile do CEIP Virxe de Covadonga.

O sábado, un grupo de veciñas e veciños voltaban a percorrer o barrio entre lusco e fusco, anunciando a chegada dos días grandes.
E o domingo, a Pita abría -un ano máis- o Desfile de Ourense. Velaquí algunhas imaxes destas dúas xornadas:

As outras visitas da Pita

Nos días previos ao Entroido, a Pita ven visitando (dentro das súas limitadas posibilidades) diversos centros de ensino e asociacións, principalmente da cidade e a súa contorna. Neste 2024, á parte da escola amiga, que foi o CEIP A Ponte, tamén nos achegamos a dar a coñecer a nosa máscara e o noso entroido ao CEIP Amadeo R. Barroso, á A VV As Termas, á Asociación Provivienda ou mesmo a Adolfo Domínguez. Con todas elas e con todos eles compartimos bos momentos. Velaquí algunhas fotos das distintas visitas:

Alá foron as olas de 2024

Tarde de olas, música e xogos a que se viviu na tarde de onte domingo na praza das Eiroás, con temperaturas máis propias de finais de abril ou primeiros de maio. Xa pasaba das 5 da tarde cando as Pitas e os músicos facían a entrada na praza das Eiroás levando o carro coas olas pintadas o día anterior polas nenas e polos nenos das Eiroás amais dos obradoiros realizados na Escola amiga deste 2024, o CEIP A Ponte, amais do Centro Comercial Ponte Vella algúns días antes.
A Pita lucía unha nova fita de cor vermellón, en memoria das máis de 25.000 persoas (a inmensa maioría nenas e nenos) mortas até o día de hoxe na guerra orixinada pola invasión de Gaza, que amais da morte de milleiros de civís, ten provocado o desprazamento do 85% da poboación civil, o balance máis desproporcionado de víctimas desde a II Guerra Mundial.
As Pitas tamén comezaron o xogo das olas, recollendo da man das autoridades do barrio a última ola de 2023, que foi a primeira de 2024. Posteriormente, mentres as olas voaban pola praza, na procura dunha man amiga que as apañara antes de escacharen no chan, as mozas e mozos máis xoves xogaban con globos e mesmo probaban algunha ola, por ir afacéndose ao tacto.
Velaquí unhas poucas imaxes da xornada, grazas -principalmente- á Pili e ao Dani.

Chega o Oleiro ás Eiroás

Vindeiro domingo, día 4 contra as 5 da tarde, poderanse ver ás primeiras Pitas que corran o Entroido deste ano levando as olas á praza das Eiroás e coa nova fita no seu broche.

A cor escollida para engadir á perfura daquelas Pitas que corran o Entroido deste ano 2024 é o VERMELLÓN, en memoria -sen querer esquecer aos milleiros de persoas que morren cada ano nas ducias de conflitos bélicos abertos no planeta- das 25.000 persoas (a inmensa maioría nenas e nenos) mortas até o día de hoxe na guerra orixinada pola invasión de Gaza, amais de provocar o desprazamento do 85% da poboación civil, o balance máis desproporcionado de víctimas desde a II Guerra Mundial.

Domingo Fareleiro 2024

O domingo disfrazouse de verán para celebrar o comezo do ciclo festivo no barrio das Eiroás. Unha tarde soleada e con temperaturas pouco apropiadas para esta época do ano propiciou un ambiente festivo e desenfadado neste entroido temperán.
A xornada comezaba xa de mañá coa chegada do Meco e a habitual recepción por parte das autoridades do barrio. Acompañaban ao encargado de presidir a praza as asesoras e os asesores de imaxe, amais dun nutrido grupo de veciñas e veciños que non quixeron perderse evento de tanto glamour. Foi un espectáculo sin par ver con que gracianatural trepaba pola farola para encaramarse ao máis alto da praza e ocupar o lugar de honra que ben merece tan alta distinción.

Programa da festa 2024

O próximo domingo día 28 de xaneiro dará comezo a 26ª edición da Festa da Pita, que -como non podía ser doutro xeito- conta coas benzóns e as licencias oportunas das autoridades do barrio, quenes agardan a chegada do Meco pouco antes do xantar do domingo, marcando o inicio do Entroido en todo o termo municipal. Alén da participación nos desfiles da cidade (o día 11) e do CEIP Virxe de Covadonga (o día 9), o programa da festa compleméntase con outras actividades promocionais e divulgativas, tales como a visita á nova escola amiga, que este ano será o CEIP A Ponte.

Así as cousas, o programa deste ano nas Eiroás será o seguinte:

Imaxe da Festa 2024

O artista, pintor e restaurador Leandro Sánchez, nacido en Mallorca e residente na cidade de Ourense, agasallounos este ano con esta fermosura de cartel, alegoría da carauta que forma parte da nosa máscara, e que pasará a formar parte do noso histórico como a imaxe da 26ª edición da Festa da Pita.
Moitas grazas, Leandro, pola túa colaboración.

Martes de Entroido 2023

As ganas de Entroido e a boa metoroloxía presente en todos os días da festa, fixo que o Martes fora, máis unha vez, o día grande nas Eiroás, por máis que a choiva ameazara desde primeiras horas. Así, puidemos dar conta do programa sen grandes atrancos, máis que os propiciados polo redeseño da praza e das infraestruturas necesarias para o desenvolvemento da festa.
Comezaba a xornada coa xa tradicional ruada polo barrio con máscaras e músicos, que facía a súa entrada na praza das Eiroás pouco antes de dar inicio a Voda á 1 do mediodía.

Este ano, o papel de crego estivo interpretado por un comisionista que viña disposto a facturar a Voda, enviado por “San Chinchón“. Ao non traer guión, decidiu empregar o ChatGPT deixando en evidencia que sempre hai alguén agochado por tras da intelixencia artificial. A sorpresa deuna a noiva, que este ano viña “picada” (aínda que ela aseguraba que “só piqué 1 vez”) e o crego decidía non oficiar a cerimonia ante tamaña confesión. Para dilucidar se había voda ou non, contamos coa presenza de Carlos III, quen chegou á praza da man de Tamara Falcó para reivindicar o seus dereitos históricos sobre o cortello de Ourense, adquiridos por Xoan de Gante e Lancaster no S. XIV.
Para recibir a tan grande autoridade, o alcalde e o presidente da ourensanía pelexábanse entrando na praza con música do videoxogo Pac-man, despois de esquivaren as distintas obras da cidade, que “parece Jerson“. O presidente da Ourensanía poñía nas mans do alcalde a unha personaxe desmemoriada (Dori, de Dorense), que tiña a chave dos cartos públicos. Despois de lembrar a Rocío Dúrcal nas bocas do alcalde e do presidente da ourensanía, cantando “Tú querías que yo votara al PP” e “Ti querías que te fixera alcalde“, marcharon abrazados ao ritmo de “Cuando decidas tú volver“. previamente, Carlos III abandonaran a praza ante a presenza dun globo chinés (ou do chinés) enviado seguramente polo Putin.

Para rematar, e como ven sendo habitual, o noso garda-civil tentou ponher orde pola brava na cinzarrada iniciada pola veciña que reclamaba o pagamento da festa aos noivos, para posteriormente irrumpiren e as Pitas na escena co obxectivo de conciliar o pasado e o presente na procura dun futuro común.

Despois do xantar na carpa, tivo lugar o baile de disfraces, extendéndose até a última hora da tarde, momento no que o Meco baixou do poste da luz coa mesma axilidade que subira no Domingo fareleiro e procedimos a despedir o Entroido das Eiroás como ben se merece ate o vindeiro 28 de xaneiro de 2024.

Só queda dar as grazas. Grazas por estarmos outra vez na praza, desta vez sen ningún tipo de medidas nin protocolos. Grazas ao concello de Ourense por facilitar a celebración deste entroido, cos momentos de tensión incluidos, grazas ao Centro Comercial Ponte Vella e a BeOne polo seu apoio nos patrocinios e grazas ás veciñas e aos veciños que fixeron posible a festa co seu apoio e a súa complicidade. Grazas tamén a todas as persoas que nos acompañastes, do barrio ou doutros lugares, facéndonos sentir a sorte que temos de contar con veciñas e veciños en tantos outros lugares do mapa.

Podedes ver a continuación algunhas imaxes da xornada, amais dun video recompilatorio con diversos momentos desta 25ª edición e unha selección de fotos da Voda da Pita cedidas por Raquel Carreira.

A fin de semana do 2023

Ao longo da fin de semana participamos en distintos actos, dentro e fóra do barrio. O venres ás 12 do mediodía, as Pitas formaban parte do Desfile do CEIP Virxe de Covadonga. Un pouco máis tarde, cara as 20 h., percorrían a cidade vella de Ourense xunto ao Entroido de Seixalbo, ao Frei Canedo e a varias máscaras da provincia.

E o domingo, abríamos un ano máis o Desfile de Ourense. A continuación, un pequeno video do desfile escolar e algunhas imaxes dos outros momentos.