A Pita nos centros de ensino

Un ano máis as manualidades da Pita estiveron presentes en distintos centros escolares. Ímonos centrar no CEIP Calvo Sotelo, do Carballiño, onde traballaron o Entroido através das distintas máscaras da provincia. Entre as actividades que levaron a cabo, tamén houbo espazo para a nosa máscara. Amablemente nos fixeron chegar estas fotos do alumnado de 6º de E.P., onde se poden ver as cousas tan lindas que fixeron coas manualidades.

Grazas Mercedes, grazas mozas e mozos do CEIP Calvo Sotelo.

Baile de máscaras – Martes de Entroido

A tarde do martes estivo marcada –un ano máis- polo baile de máscaras e as pasarelas de disfraces, que foron acompañando a xornada até a noitiña, momento no que o Meco baixou do alto do poste para ser paseado por todo o Campo da festa e despedido polas mozas do barrio. Voltaron a ocupar boa parte da praza numerosos disfraces de diferentes confeccións, realizados con ganas de festa e muita imaxinación.

De reseñar este ano foi o éxito acadado pola tenda de dona Gumersinda -parte importante para o finanzamento da festa-. Neste posto, ademáis de poder solicitar material informativo da festa, podíanse adquirir as tradicionais camisolas ou postais da festa, a Bica da Pita, e –como novidade este ano- uns broches de feltro da máscara ou unhas galletas realizadas en colaboración coa confitaría Milhojas.

Voda da Pita 2012

Xa vai sendo hora de subir algunhas imaxes do día grande da Festa, que este ano estivo mui animado. Imos, nesta nova, a falar da xornada matutina, que comezaba a primeira hora coa montaxe de todas as estruturas precisas na praza para festexar o evento máis agardado do ano. Antes do mediodía tiña lugar o pasa-rúas por conta dun grupo de Pitas e da Charanga Chunda-Chunda.

Ás 13 h. tivo lugar –un ano máis- a Voda da Pita, lembrando con sorna mais con agarimo á circunstancia que aló pola década dos ’50 dera orixe á nosa festa. A voda, que comezou facendo alusións á posibilidade de ter que suspendela por causa dos excesivos recortes sufridos na actualidade en todos os sectores, contou coa presenza “inesperada” do presidente d. Mariano. E a propia voda e os actos da mañá tamén contaron coa presenza (esta vez de verdade) de Cristina García Rodero, a prestixiosa documentalista fotográfica da Axencia Magnun. Como non podía ser doutro xeito, á voda seguiulle un banquete “como Deus manda” (que diría o outro).

As Pitas no Entroido da cidade

As múltiples baixas deste ano (ben por maternidade ou por enfermidade) non provocaron que, por 11º ano consecutivo, as Pitas participaran no Desfile da cidade, pasado domingo 19. Cousa á parte foi a circunstancia que estivo a piques de provocar –por primeira vez na existencia da máscara- que non se realizara o percorrido urbán acompañando a todas as comparsas participantes. Tal circunstancia foi a colocación dun grupo de cabalos na dianteira do desfile, que encheron o firme de excrementos e mesmo provocaron algún momento difícil entre os participantes.

Xa van 10 anos desde que lle propuxeramos á organización (Concello de Ourense) que a nosa máscara participaría no desfile sempre que o fixera encabezando o mesmo e fóra de concurso. Queriamo,s deste xeito, promover a participación de máscaras e comparsas no desfile que non viviran a festa como unha competición ao tempo que nos facilitara o noso particular percorrido, con certas dificultades ao irmos correndo na maior parte do mesmo e con escasa visibilidade. Así foi durante todas as edicións… até este 2012, que non sabemos ben polo que, nos atopamos con unha comparsa na dianteira, que por enriba contaba con cabalos. Sen querer criticar a participación deste grupo, antes ben todo o contrario, faise difícil entender o criterio da organización á hora de mudar a orde acostumada sen siquer ternos en conta nin facernos coñecedores deste feito.

Alá foron as olas

Pasaban uns minutos das 5 da tarde cuando un grupo de Pitas, lucindo a fita marela no seu broche e acompañadas da Charanga Os Chispas, facían a entrada na praza d’As Eiroás portando o carro das olas. Facían así a súa primeira aparición no Entroido do 2012 as máscaras d’As Eiroás, quen, despois de xogar a primeira ronda, convidaron aos veciños asistentes a darlles o relevo no xogo.

Este xogo, que consiste en unha roda de persoas que se atiran unha ola de barro entre si, tentando sempre que non escache e rindo de quen a non consiga apañala no ar extendeuse até ver como escachaban -unha a unha- as máis de 50 olas procedentes de Niñodaguia que a organización poñía ao dispor dos asistentes. Houbo olas grandes e pequenas (para maiores e mozos), así como globos cheos de auga, pensados para os máis cativos.

Chega o Domingo Oleiro

A festa continúa, e así chegamos ao Domingo Oleiro (Oleiro en Ourense, noutro lugares máis coñecido como Corredoiro).

Nesta xornada saen as Pitas por primeira vez, que lucirán no seu ombreiro unha nova fita -a MARELA- que identifica ás máscaras que van correr esta edición do 2012, unha fita que, ademáis, levará as inicias “G“, “A” e “R” correspondentes aos nacementos de Gabriel, Aldara e Roi, respectivamente, a quen damos a benvida ao mundo e á súa festa. a Ás 5 da tarde, coa animación da Charanga Os Chispas, as Pitas farán a súa entrada co carro das olas na Praza d’As Eiroás. Máis de medio cento de olas cocidas en Niñodaguia e preparadas para escachar nas mans de quen non acade apañalas no ar.

Os outros Entroidos da cidade

Pasado xoves tivo lugar no Salón de Plenos do concello de Ourense a presentación oficial do Entroido da cidade. Participaban da mesma, distintas representacións d’A Ponte, Seixalvo e da A. C. Amencer, ademáis d’As Eiroás e os que serán pregoeiros desta edición: Paco Gallego e Manuel Varela.

As diferentes celebracións do Entroido en Ourense, lonxe de competir entre elas, compleméntase perfectamente deixan ás claras a circunstancia de atopármonos en unha cidade na que o ciclo festivo tradicional e o Entroido en particular segue moi vivo, reinventándose e perdurando ao longo dos anos.

Aquí podedes consultar o Programa do Entroido no concello de Ourense e a continuación achegamos os programas de festas d’A Ponte (Frei Canedo) e de Seixalbo (Paquita e Nicanor).

Alí onde esteades, gozade do Entroido!!

O Domingo Fareleiro abre a celebración do Entroido na cidade

Pasado domingo 5, tiña lugar o Domingo Fareleiro n’As Eiroás. Con esta celebración abríase o ciclo do Entroido na cidade de Ourense.

Pola mañá procedeuse á recepción oficial do Merkol na praza d’As Eiroás, que este ano disque viña da Alemaña e á que asistiron distintos veciños en representación das autoridades locais, que excusaron -en parte- a súa ausencia por problemas de saúde ou de axenda. Aínda así, o Meco ficou instalado no seu lugar, presidindo a praza e vixiando que o barrio celebre “como é debido” o seu particular Entroido.

Xa de tarde, 200 kg de farelo animaron a xornada, xunto á Charanga Nova Terra, de Trives e, aínda que a participación foi máis ben escasa neste ano, a Festa da Pita comezaba a súa andaina na 14ª edición.

 

O broche lucirá a cor marela

Do ombreiro do traxe da Pita sae un broche (ou perfura) de coiro que nos indica a antigüidade de cada máscara. No propio broche pode verse o logotipo da asociación e a data na que saiu por primeira vez a máscara completa (2002). Da perfura colgan unhas fitas grosas de cores, cada unha representando o ano en que correu o entroido esa máscara.

A cor de cada fita elíxese en base aos feitos acaecidos ao longo de cada ano, e neste senso, o MARELO será a cor que pendurará do broche neste 2012, pois desde a Asociación Amigas/os da Pita entendemos que 2011 supuxo o ano das revoltas sociais en medio mundo. O norte de África mudou o mapa socio-político e no noso entorno máis próximo (o Estado e mesmo a cidade) vivíronse concentracións emanadas do que se deu en chamar 15-M, que trascendeu a un bon número de países do mundo. Escóllese esta cor por ser unha das 2 cores (xunto ao negro) empregadas por este movimento. Asemade, e seguindo co costume de incluir as iniciais dos bebés nacidos dunha Pita ao longo do ano, a fita deste 2012 incluirá 3 iniciais, por outras tantas crianzas recén chegadas ao mundo no contorno da festa.

Lembrar que as primeiras máscaras poderanse ver n’As Eiroás o Domingo Oleiro (vindeiro 12 de febreiro).

Eis o resto das cores do broche

Festa da Pita 2012

E chega unha nova edición. Nin as axencias de calificación nin as predicións dos maias puderon evitar que, un ano máis, o Entroido xa estea aquí; disposto a facernos vivir momentos inesquecibles e a axudarnos a evadir os nosos problemas cotiáns.

A imaxe deste ano correu por conta do artista e deseñador ourensán Miguel Suárez, que elixe novamente a máscara do barrio como fondo para albergar as datas da festa.

Só resta desexar que gocedes da nosa Festa ou do Entroido aló onde vos atopedes, e se nalgo faltamos…. outro día sobraremos.